California-ah ramkang vangin mi 50,000 sawnchhuak

US-a California state-ah ram a kang leh a, ramkang vang hian Los Angeles hmarlama cheng mi 50,000 vel chu hmun him lama insawnchhuah tir an ni. 

Ningani khan Los Angeles hmarlam km 65 vela hla, Santa Clarita-ah ramkang nasa tak a chhuak leh a, Tick Fire tiin a hming an vuah. Thli a tleh tel avangin a kangkai chak hle a, ram acre 10,000 zeta zau a kang tawh a ni. 

Kangmei chhuak hian chenna in pawh eng emaw zat a kang tel tawh a, major highway leh kawngpui dangte pawh khar an nih phah bawk. Ram kang ṭhelh hna hi kangṭhelhtu 500 chuangin an thawk mek a, air tanker leh helicopter-te an hmang a ni. Nimin khan kangmei chhuak zinga 5% vel chauh an la ṭhelhmit thei a ni.

Fire department thupuangtu chuan ram kanna chhehvela awmte chu a rang thei anga hmun him lama insawnchhuak tura an hriattir thu a sawi. Kangmei chhuak hian Pacific Gas and Electricity Co. tranmission tower base bul a kan tel avangin mi tam tak power supply nei loin an awm phah bawk. Kum 2017 leh 2018-a kangmei chhuakin an hmanrua tam tak a kanchhiat avangin PG&E hian January thla khan sum lama an tlakchhiat thu a lo sawi tawh a ni.