Barcelona-ah freedom rally huaihawt

Spain aṭanga Catalonia indan phutin kar kal ta Inrinni khan Catalonia khawpui, Barcelona-ah freedom rally huaihawt a ni a, mi nuai thum chuang zet an tel. 

Inrinni-a rally hi indepen­dence thlawptu pawl pahnih, ANC leh Omnium Cultural huaihawt a ni. Mipui kal­khawm­te hian kum hnih liam ta October ni khat a Catalonia mipuiten Spain aṭanga  indan an duh thu thutlukna an siam, Spain sorkarin a hnawlsak tak chu an theihnghilh mai dawn lo tih leh, Spain lakah an tlawm dawn lo tih thuziakte an keng a ni. 

Catalan sorkarin kum 2017-a Spain lak aṭanga inlakhran duh leh duh loh chungchanga mipuite ngaihdan a lakah, inlakhran duhtu lam an tam zawk a ni. Mahse an vote hi Spain sorkar chuan hnawl­sakin, ram danpui kalh a ni a ti a, Catalan sorkar pawh a ṭhiahsak zui a ni. Catalan hruaitu eng emaw zat pawh man zui niin, ṭhenkhat chu ram pawn lamah an tlanchhe bawk. 

Tun hnaiah Catalan mipuite hian inlakhran duhin, Spain sorkar lakah lungawi lohna an lantir thar leh fo a ni. Nawrh huaihawtnaa buaina chhuakah mi 600 chuangin hliam an tuar tawh a, an zingah hian police 289 an tel.