Chile President-in a cabinet a ṭhiat

Chile president Sebastian Piñera chuan nawrh huaihawtten an thil phut 'social reforms' tihhlawhtlinna tur leh sor­kar thar din a nih theihna turin a cabinet a ṭhiat.

Cabinet thlak danglam dan hi hriat a la ni lo a, President hian cabinet tihtawp a nih thu hi a minister zawng zawngte hnenah a hriattir thu leh nawrh huai­hawtte thil phut tihhlawhtlinna atana ti a nih thu hi a sawi a ni.

Zirtawpni liam ta khan mi sang tam takin Chile khawpui Santiago-ah tharum thawh loin kawng an zawh a, hemi hnu hian Sebastian Piñera pawhin an thil phut chu a hriat thu a sawi. Piñera hian curfew puan pawh hlih a ni tawh tih a sawi a, eptu lam chuan state of emergency puan pawh sut turin an ngen bawk.

Santiago governor Karla Rubilar chuan mi maktaduai chuangin kawng hi an zawh tih sawiin, kawng zawh zawng zawng hi an ram mipui 5% an tlin phak thu a sawi. Nawrh huaihawttute pawhin 1990 hnu lama an rama duh lohna lantirna lian ber a nih thu an sawi a ni.

Chile-ah hian sorkarin metro fare a tihsan avangin nawrh hi huaihawt ṭan a ni a, hei hian zual lam pan zelin thildang hrang hrang vangin sorkar duh lohna hi an lantir chhunzawm. Tharum thawhna pawh a chhuak nasa hle a, mi 7,000 vel zet man an ni tawh bawk.

Latin America ram zinga ram hausa ber pakhat ni phak mah se Chile-ah hian intluk tlan lohna a nasa hle a, Organisation for Economic Co-operation and Development (OECD) ram member 36 awm zinga sum lakluh inang lo nasa ber ram an ni thung.