Israel : Gantz leh Netanhayhu te inbia

Israel-a ṭangrual sorkar din dan ngaihtuahin, Israel prime minister Benjamin Netanyahu leh politics lama a elpui ber, Blue and White party hotu Benny Gantz-te chu Pathianni khan an inbia. 

Israel President Reuven Rivlin chuan PM Netanyahu hi sorkar siam turin a sawm hmasa a, mahse ni 28 hun pek chhungin Netanhyah hian ṭangrual sorkar siam turin party dangte inremna a siampui thei lo a, sorkar a siam theih loh thu President hi a hrilh a ni. 

Hemi hnu hian President Rivlin chuan sipai hotu hlui, Benny Gantz hi kar kal ta Nilaini khan sorkar siam turin a sawm leh a, ani pawh hian ni 28 chhung hun a nei ve leh ang. Israel hian kumin April thla khan inthlanpui an nei tawh a, mahse hun tiam chhunga sorkar siam thei an awm loh avangin a vawi hnihna atan September thla khan inthlanpui an nei leh a ni. Sorkar siam tur hian Parliament seat 120 awmnaah thlawptu 61 tal an neih phak a ngai a ni. 

Netanyahu-a'n Likud Party kaihhruai ṭangrual sorkar siam tura an beihna a hlawhchham thu a sawi hnuah, Gantz hian  thawhpui tur a zawng ve leh mek a ni. Blue and White party hian member 33 neiin, Likud Party hian member 32 a nei thung. 

Gantz chuan Likud party nena thuneihna insem zai a, ṭangrual sorkar siam theih dan a dap a, hemi atan hian Pathianni khan Netanyahu nen hian an inbia. Meeting zawha thuchhuah inṭawm an siamah, thutlukna engmah siam a la ni lo tih erawh an sawilang nghal a, meeting hi neih chhunzawm leh an la tum. Hruaitu pahnihte hian sorkar inṭawm siam chu ṭha ti dun tho mah se, chanpual  insem dan chungchangah an la inrem thei lo nia sawi a ni. 

Gantz hian hun pek chhunga sorkar thar a din thei lo a nih chuan, Parliament member-ten sorkar thar siam turin candidate pakhat an rawt ve leh thei a ni. Ani pawh hi ni 28 chhung hun pek a ni ve leh ang a, huntiam chhunga sorkar a siam thei lo a nih chuan, Israel hian kumin chhunga a ṭum thumna atan inthlanpui an hmachhawn leh a ngai ang.