EU-in Jan 31 thleng Brexit pawhsei rawt

European Union (EU) chuan EU aṭanga Britain inlakchhuah hun tura October 31 ruat chu nakkum January 31 thlenga pawhsei a rawt. 

EU-in rawtna a siamah hian, Britain chuan EU hi a theih anga hmain a chhuahsan thei dawn a, January 31 thleng nghak kher loin inremna an siam theih chuan November emaw, December emaw ah pawh a chhuahsan thei ang. 

He rawtna chungchang ngaih­tuah hian nimin khan Brussels-ah a EU palaite an inhmukhawm a, member ramte pawhin an pawmtlan theih beisei a ni. 

Hetih lai hian France president Emmanuel Macron chuan thla thum chhung pawhsei rawtna hi hnialin, thla khat atan pawhsei sak a, November 30 thleng hun pek a rawt thung. Nimin vek khan Britain par­liament chuan prime minister Boris Johnson-an December 12-a inthlanpui neih rawtna motion a putluh chungchang an ngaihtuah bawk. PM rawtna hi tlang tur chuan House of Commons-ah member hmun thuma ṭhena hmun hnihten an thlawp a ngai dawn a, mahse hei hi a hmuh phak rin a ni lo thung. PM Johnson hian EU  hruaitute nena EU aṭanga inlakchhuahna tura inremna an siam, Britain Parliament member-ten an hnawlsak hnuah, Brexit kalpui tak tak tur chuan an ramin inthlanpui an neih hmasak a ngai nia sawiin, inthlanpui neih hma hi a rawt a ni.