Belgium PM atan Sophie Wilmes ruat

Belgium lal,  King Philippe chuan Pathianni khan Budget and Public Service Minister Sophie Wilmes chu an ram Prime Minister atan a ruat a, hmeichhe zinga PM ni thei hmasa ber ni. 

Kar kal ta Inrinni khan kum 44 mi Sophie Wilmes hi PM atan thlan a nih hunah, Pathianni khan King Philippe chuan PM lailawk atan a ruat a ni. Sophie hian Charles Michel a thlak a ni. Michel hi December thla aṭangin European Council president ah a awm dawn a ni. 

Sophie Wilmes hian kum 2000 khan politics a luhchilh ve chauh a, kum 2004-ah a vawikhatna atan Parliament member-ah thlan tlin a ni. Kum 2014-15 khan Flemish Brabant province-ah councillor a ni a, kum 2014-ah Chamber of Represtentives ah thlan tlin a ni. Kum 2015 September thlaa minister of the budget Herve Jamar a ban avangin a thlaktuah dah a ni

"Ka thawhpuite lakah hian lawmthu ka sawi tak meuh meuh a, kan ram a ngialngheh nan, engpawh ka thawh turah chuan theihtawp ka chhuah ang." tiin Sophie hian a twitter-ah a sawi. Nikum December aṭang khan Belgium hi sorkar mumal a awm loin a kal a, kumin May 26 khan inthlanna neih a ni a, Wallonia, Flanders leh Brussels bialah chuan regional sorkar din ni mah se, sorkar laipui din tura inbiakna erawh kalpui a la ni lo.

Khawtlang, economy lamah leh inrelbawlna lama heng bial pathumteah hian, thil felfai tawk lo leh harsatna neuh neuh a awm avangin, sorkarna mumal a la awm thei chuang lo. Kum 2010 leh 2011 inkar khan ni 541 chhung sorkar mumal awm loin Belgium hi a lo awm tawh bawk a ni.