AA helpawlin Myanmar sipai rubo

Myanmar-a Arakan Army hel pawlte chuan Rakhine state-ah sipai, police leh civil official eng emaw zat an rubo a, mahse an mi rukbote an dahna lawng chu sipaiten helicopter aṭanga an beihnaah an kap fuh tih an sawi. 

Pathianni khan AA  hian an website-ah hemi chungchang hi tarlangin, an mi mante an dahna lawng pathum chu sipaite hian helicopter aṭangin an rawn kap a, lawng pahnih chu a pil niin a sawi. Helicopter aṭanga an beihnaah hian an mi mante bakah helpawl member ṭhenkhat pawh an thi tih an sawi a, thi zat tak erawh an sawichiang lo. 

Information Ministry chuan AA member 30 velin, civil mi 165 leh sorkar official 50 vel chuanna lawng chu Rakhine khawpui, Sittwe hmarlamah an man tih a sawi thung. Helho mante chhanchhuak tur hian helicopter tirh a ni, a ti. Helicopter hi helho hian an lo kap let tih a sawi a, helho man zinga mi 14 chu chhanchhuah an nih thu a sawi. 

Arakan Army hi Rakhine state tana thuneihna sang zawk pek phuttu niin, hun rei tak sorkar lakah an  hel tawh a ni. Helho bei let tur hian sorkar chuan Rakhine-ah hian sipai ṭhahnem tak a tir lut bawk. Nikum December thla aṭang khan helpawl leh sorkar sipaite hi an inkap fo a, hei vang hian civil mi eng emaw zat chu hmun him lamah an tlanchhe tawh a ni.