Iraq-ah nawrh huaihawt avangin mi 63-in nunna chân

Iraqi Commission for Human Rights member Ali al Bayati chuan Iraq a nawrh huaihawt avangin, mi 63-in nunna an chan thu leh mi 2,600-in hliam an tawrh tawh thu a sawi. 

Hna leh vangtlang tana hamṭhatna ngaihtuah sak tura sorkar laka lungawilo Iraq mipuite chuan kar kal ta Inrinni khan a vawihnihna atan kawngah nawrh an huaihawt leh a, hetah hian Security force-te leh nawrh huaihawtte hi an intawng leh a ni. 

Nawrh huaihawtte hnawhdarh nan police-te chuan silai an hmang nia sawi a ni a, mahse hei hi thu dik tawk lo a ni tiin interior ministry chuan a tarlang. Hliam zingah hian Security force-te pawh an awm nual thu tarlan a ni bawk.

Kar kal ta Inrinni zan khan Iraq khawpui Baghdad-ah leh Tahrir Square-ahte chuan power tihtawp a ni a, nawrh huaihawta kawng puia riakbuk sual tumte chu police-te chuan luhkhungin, an riakbukte chu an tihchhiat sak. Hetah hiam mi 30 velin hliam na tak an tawrh thu interior ministry official chuan a tarlang.

Electric leh tui mumal loh avang leh economy a tlakchhiat mai bakah, eirukna a hluar em avangin mipuite hi sorkar lakah an lungawi lo a, kar kal ta Zirtawpni khan sorkar laka lungawi lohna liamtham lantir hi neih ṭan a ni.