Argentina president thlannaah Fernández chak

Argentina president thlanna, Pathiannia neih takah centre-left eptu candidate Alberto Fernández chuan a khingpui president ni lai Mauricio Macri hnehin, Argentina president thar atan thlan tlin a ni. 

Justicialist Party hruaitu Fer­nández hian vote tla aṭangin 47.79% a hmu a, a khingpui Macri hian vote 40.71% a hmu thung. December 10-ah president atan lak luh a ni ang. President tling tur hian vote tla aṭanga 45% hmuh phak a ngai a ni. Hei hi an hmuh phak loh pawhin,  vote 40% a hmuh a, amah hnaih bertu candidate aiin 10% a hmuh tam a ngai thung. Argentina president hi ballot system hmanga thlan a ni. 

A tling tih an hriat veleh, Fer­nández thlawptute hian an khawpui Buenos Aires-ah pungkawmin kawtthlerah an lawm zui nghal a, Fernández thlalak chuanna kawr an ha, Argentinian flag te vaiin khawlai an fang zui bawk. President kal chhuak tur Macri hi thlantlin a nih dawn khan, mipuite hnenah an ram chu retheihna awm tawh lohnaah siam a tum thu a intiam­kam a ni. Mahse kum li chhung a president khan Agrentina-ah hian retheihna chu umbo a ni chuang lo. 

Agrentina president hlui Cristina Kirchner chu vice president atan thlan tlin a ni bawk. Kirchner hi Fernandez-an hnehna a chan theihna kawngah mi pawimawh tak nia ngaih a ni a, amah avanga Fernandez vote phahtu tam tak an awm a ni.