Philippines-ah magnitude 6.6-a nain lir a nghing

Philippines chhim lamah nimin zing khan magnitude 6.6-a nain lir a nghing a, mi pali an thi. Nimina lirnghinna hmun hi October 16-a magnitude 6.3-a lir lo nghin tawhna hmun bawk kha a ni. 

Lirnghing inṭanna hi Cotabato province-a Tulunan khaw hmarchhak lam a ni. Lir­nghingin chhiatna a thlenah mi pali an thi a, hliam tuar eng emaw zat an awm bawk. In pawh a sawi chhe nual nia sawi a ni. 

Tulunan Mayor Reuel Limbungan chuan school hrang hrangte chu class la chhunzawm lo tur leh, building te pawh engineer te endik tura thupek a tihchhuah thu a sawi. Damdawiina damlote pawh pawn lamah hruai chhuah an ni bawk. 

Philippines hi Pacific Ring of Fire-a awm a ni a, he hmun hi khawvela lirnghing thleng zinga 90% vel thlenna  hmun a ni. Kum 2013 khan Philippines-ah hian magnitude 7.1-a lir nghin vangin mi 220 chuangin nunna an lo chan tawh a, kum 1990 khan magnitude 7.8-a naa lir nghing vangin mi 2,400 chuang an lo thi tawh bawk.