IS hotupa luhchhuah dan video tichhuak maithei
US President Donald Trump chuan Thawhṭanni khan US special operation-in Syria hmarthlang lama tunnel chhunga Islamic State (IS) firfiak pawl hotupa Abu Bakr al-Baghdadi an luhchhuahna video chu an tihchhuah mai theih thu a sawi.
Kar kalta Inrinni khan Baghdadi hi US sipaiten beihpui an thlakna karah hian, thihchilh bomb hmangin a intihlum niin an sawi a ni. White House-a thuthar thehdartute hmaah Trump chuan, "Video hi tihchhuah a ni maithei a,mahse tihchhuah anih pawhin ṭhenkhat chu tih lan a ni lo ang. Hman aṭanga kan zawn tawh Baghdadi hi tunah chuan a thi tawh a, weekend-ah thah a nih hi kan lawm em em a ni. Keini tan chuan ni chhinchhiah tlak tak a ni", tiin a sawi.
Kum 48 mi Iranian Baghdadi hian kum 2014 khan Syria leh Iraq ramah hian muslim lalram dinna turin ram zau tak a la a ni. A lal ram zauhnaah hian mi tam takin nunna an chan a, amah hi mawhphurtuah puh a ni. Tunnel chhunga al-Baghdadi luhchhuah an tumnaah hian US special force uifing pakhat chuan hliam a tuar a, he ui thlalak hi President Trump pawhin a twitter-ah a tarlang a, mahse a hming erawh a sawilang lo. Trump chuan he ui hian IS hotu thah a nih theihna kawngah hna ropui tak a thawk a ni, tiin a hliam hi enkawl mek a nih thu a sawi.