US-in indo thlawhtheihna F-35 lei dawn

United States Department of Defense chuan defense contractor Lockheed Martin company hnen aṭangin, indo thlawhtheihna 478 leh F-35 Lightning II a lei tur thu chu a tichiang ta.

US Air Force Lieutenant Gene­ral Eric Fick chuan Air Force-te hman tur atan F-35A jet 351, Marine Corp-te hman tur F-35B 86 leh carrier-based operation atan F-35C 41 lei a nih tur thu a sawi.

Hetih lai hian defense contractor Lockheed Martin-te chuan U.S. Service tan hian aircraft 291, inter­national partner atan F-35 127 leh ramdangte hnenah hralh chhawn leh tur F-35 60-te chu lei turin US Department of Defense nen inremna an siam thu thuchhuah an siam ve bawk.

Thlawhtheihna hi US-in a lei a nih chuan khawvela ralthuam leina man hautak ber a ni dawn a ni. Indo thlawhtheihna 478 lei tur man zat chu US dollar tluklehdingawn 34 a ni ang. Lockheed Martin company hian khawvel hmun hrang hrangah, F-35 aircraft 440 zet an hralh chhuak tawh tih Pentagon chuan a tarlang.