Turkey, Russia leh Iran FM-ten Syrian Constitutional Committee an pawm

Turkey, Iran leh Russia Foreign Minister-te chuan Thawhlehni khan Syrian Con­stitutional Committee din tur chu an pawm thu an sawi. Syrian Constitutional Committee hi nimin khan tlangzarh a ni.

Turkey foreign minister Mevlut Cavusoglu chuan Syria buaina chu sipai hmanga chinfel chi a ni lo tih a sawi a, 'humani­tarian issue' chu Syria ram pum­ah ngaihpawimawh a ṭul a, ramdanga tlanchhiate pawhin kir leh an duhna tur boruak ṭha siam a ṭul hle tih a sawi bawk. 

Russia foreign minister Sergei Lavrov chuan Iran leh Turkey minister-te nen hian UN Special Envoy for Syria, Geir Pedersen hnen aṭangin thil awmdan kimchang takin an ngaithla tih leh an ngaihtuah ho tih sawiin, Syrian Constitutional Committee chungchang chu an thupui ber a nih thu a sawi.

Syria-a muanna a awmna tur chuan UN resolution 2254 kalpui a ngai a, a kalpuina tak tak erawh chu Syrian ho kutah a awm thung a ni, a ti. Iran foreign minister Javad Zarif pawhin Syria buaina chinfel chu thil ṭul tak a ni tih leh Committee din thar pawh chuan an thlawpna a dawn tur thu a sawi ve bawk.

Committee din chuan bei­seina thar phurawm tak a siam a, Syria mipuite tan beiseina kan nei tur a ni, a ti. September thla khan United Nations chuan Syrian consti­tutional committee din a nih chungchang hi sawiin, eptu pawl, civil society leh sorkar aiawhte an tel tih leh kum hnih zet inbiakna neih a nih hnua din a nih thu a puang.

He committee-ah hian mem­ber 150- an awm a, nikum January-a Russia-a peace confe­rence neihnaa din rawt a lo nih tawh anga din niin, Syrian constitution an siamṭha ang. Nimin khan a ṭumkhatna atan Geneva-ah Committee hi an ṭhukhawm a, heihi UN chuan Syria sorkar leh eptu pawlin politics inremna an siam hmasak ber, kum riat chuang indona awm tawh titawp tuah a ngai a ni. Turkey, Iran leh Russia Foreign Minister-te hian Thawh­lehni khan joint-press conference koin Committee an thlawp thu hi an sawichhuak a ni.