Covid-19 Hri kai mtd 100 chuang tawh

John Hopkins University data-a landanin, khawvel pumah Covid-19 hri kai hmuh chhuah tawh chu mi maktaduai 100 an chuang tawh. 

China-a Wuhan khawpuia Covid-19 hri hmuhchhuah a nih aṭanga kum khat chuang awrhah hri kai mi maktaduai 100 an chuang tawh a, mi maktaduai 2.1 in an thihpui tawh bawk. Hetih lai hian hri kai hmuh chhuah tawh zinga maktaduai 55 chuang chu enkawl dam an ni tawh thung. 

Hri leng darh zel tur venna atana ram hrang hrangten khuahkhirhna khauh tak tak an siam leh, ram tam takah vaccine pek chhuah a nih tawh hnuah United Kingdom, South Africa leh Brazil-a Covid hri chi thar hi hmuh chhuah belh leh a ni tawh bawk. 

US chu hri kai tamna leh thihpui tamna ber ram a la ni zel a, hri kai hi maktaduai 25.3 awm tawhin, khawvel puma hri kai pali zinga pakhat zel chu US-a mi an ni. US-ah hian Covid-19 thihpui hi 4,24,000 chuang an awm tawh a ni. 

January 26-a US President atana lakluh, Joe Biden chuan an rama hri darh zel chu theihtawpa thunun tuma an bei tur thu Thawhlehnia news conference a neihnaah a sawi a, sorkar chuan Covid vaccine dose maktaduai 200 lei belh a tum tih a sawi bawk. "Kan tum ber chu Covid-19 hneh hi a ni a, hemi tihlawhtling tur chuan a tam thei ang berin vaccine an lak hi a ngai a ni," a ti. 

India chu hri kai tamna ram pahnihna niin, mi maktaduai 10.6 chuangin hri hi an kai tawh a, Brazil chu pathumna niin Covid-19 kai hi maktaduai 8.8 chuang hmuh an ni tawh bawk. Brazil hi hri kai tamna ram pathumna ni mah se, hripui vanga thi chu India aiin an tam zawk a, mi 2,17,000 in an thihpui tawh a ni. 

Europe ram zingah UK chu hripui vanga thi tamna ber ram niin, mi maktaduai khat chuan an thi tawh. Prime minister Boris Johnson chuan hripui vanga an ram mi tam takin nunna an chan chu pawi a ti takzet tih sawiin, hri dona kawnga sorkarin hma laknaah thil fel tawk lote a awm a nih pawhin mawhphurhna a lak vek thu a sawi.