Republican Senator tam zawkin Trump impeachment trial thlawp lo
US President kalchhuak, Donald Trump impeachment trial kalpui chhunzawm thlawp lo lamah Senate-a Republican member tam zawkin an vote a, impeachment trial chu tihtawp an duh. Hei vang hian Democrats lam tum dan anga US Capitol Building-a buaina chhuak chungchanga Trump thiam loh chantir an tumna chu a hlawhtlin theih a rinawm loh ta hle.
Republican Senator Rand Paul chuan Thawhlehni khan an ram danpuiah President hluite impeach-na tur hi sawi tel a ni lo tih sawiin, Trump laka impeachment trial kalpui tum chu tihtawp rawtna motion a pharh a ni. Motion chungchangah vote laknaah Democratic kaihhruai Senate-ah hian motion thlawp lo lamah vote 55 tlain, a thlawp lamah vote 45 a tla thung. Motion duh lo lamah hian Republican legislator pangain Democrats lam hi an vote pui a ni. Trump thiam loh chantir a nihna tur chuan Democrats lam hian Republican lam vote 17 an hmuh belh leh a la ngai dawn a, hei vang hian Trump thiam loh chantir hi a harsat a rinawm.
Rand Paul chuan trial neih tur hi dang thei lo mah se, a motion put luh chu thlawptu 45 an awm avangin, impeachment trial kalpui tur chu an ngaihtuah rualin awmze nei lo a ni nghal dawn tih a chiang a ni, a ti. President hlui Donald Trump impeachment trial hi ruahman lawk angin February 9 kar hian neih a ni ang. An ram danpuiah chuan presidential impeachment trial hi chief justice-in a kaihruai tur tih a ni a, mahse Trump hi President ṭanglai a nih tawh loh avangin Democrat Senator Patrick Leahy-a'n a kaihruai dawn a ni.