Lebanon-a buaina chhuakah mi 35 chuang an hliam

Lebanon hmarlam, Tripoli-ah Thawhlehni zan khan lock­down puan duh loa nawrh huaihawt leh security force-te inkarah buaina chhuakin, mi 35 chuangin hliam an tuar. 

Hripui leng vanga Lebanon thuneituten total lockdown an puan chu duh loin mi tam tak pungkhawmin lungawi lohna an lantir a, Tripoli sorkar headquartrers bula police car-te halin, security force-te chu lungin an tawng bawk. Mipui pungkhawmte hnawh darh nan security force-te chuan rubber bullet an kap chhuak ve bawk. 

Thawhlehni zan hian central Beirut-ah pawh nawrhhauihat a ni a, pungkhawmte chuan kawngpuite dangin, motor ke te an hal a ni. Lebanon-a khawpui rethei ber zinga mi, Tripoli-ah hian lockdown vangin mi tam takin eizawnna kawngah harsatna an tawk a, an rethei phah avangin inkharkhipna puan hi tihtawp phutin nawrh pawh an lo huaihawt fo tawh a ni. Sorkar hian sum a ngah tawk loh avangin lockdown avanga sumdawnna kawnga harsatna tawk leh an hna chante chhawmdawlna pek tur hi a ruahman thei lo a ni. 

Lebanon ramah hian hri kai an pung chak hle a, mipui maktaduai nga vel awmnaah hri kai hmuh chhuah tawh hi mi 2,86,000 an tling tawh. Hei vang hian sorkar chuan thla khat dawn ram pum huapin lockdown hi a puang tawh a ni. Hri kai an pun belh zel avangin an ram chhunga hospital-te pawh an indaih lo tawh hle a, ICU khumte pawh an luah khat reng niin an sawi.