Poland hnenah Germany-in ngaihdam dil

Germany President Frank-Walter Steinmeier chuan nimin khan, kum 80 liam ta, Indopui II-na hunlaia Poland khua Wielun-a Germany-in bomb an thlak avangin ngaihdam a dil. 

Poland ram chuan nimin khan Westerplatte-ah khawvel ram hrang hrang hruaitute nen, Germany indo thlawhtheihna Luftwaffe-in an khawpui pakhat Wielun a bomb champha hriatrengna hun  an hmang a ni. Poland president Andrzej Duda chuan he thil thleng hian Poland leh Germany inṭhianthatna a thlen zawk thu sawiin, Germany president Steinmeier chungah lawmthu a sawi bawk. Wielun hmuna bomb puaka dam chhuak kum 88 a upa Tadeusz Sierandt chuan meikhu nasa tak, thil kang leh mitthi ruang a hmuh thu sawiin, engkim hi a kang emaw tih tur khawpa rapthlak a nih thu kalkawmte hmaah a sawi.

He hriatrengna hunah hian ram hrang hrang palai 40 bawrvel an tel thei a, France president Emmanuel Macron, Britain prime minister Boris Johnson, Russia president Vladimir Putin leh US president Donald Trump-te chu he huna ram hruaitu tel lo langsar zual an ni. 

Kum 1939 September 1 khan Germany indo thlawhna Luftwaffe (air force) chuan Poland khua Wielun-ah bomb a thlak a, he khuaa mihring chenna in 70% bawr vel chu tihchhiat a ni a, mihring maktaduai 6 bawr velin nunna an chan.

Historian ṭhenkhatte chuan he bomb thlak hi Indopui II-na inṭanna a ni, an ti. Bomb thlak a nih hma lawk hian Germany leh Soviet Union-te chuan 'Molotov-Ribbentrop Pact' an lo ziak tawh bawk a, he inremnaah hian ram pahnihte hian indo lohna tur thuthlung an ziak a ni. Bomb thlak a nih hnu September 17-ah Soviet Union chuan Poland ram hi a run tur thu khawvel hriatah a puang ve nghal bawk. 

German ram thununtu Nazi pawlte'n Soviet Union nena an thawhdunna an tihtawp hnuah, Axis power (German, Italy leh Japan) leh Allied force (Britain, the Soviet Union leh United States) te chu lo piangin, heng ramte hi indopui II-na hunlaia a phusa berte an ni.