Kashmir khuahkhirhna hlih hma chuan India inbiakna neihpui a ni lo ang : Pakistan FM

Pakistan foreign minister Shah Mehmood Qureshi chuan India sorkarin Jammu and Kashmir a khuahkhirhna chu a hlih hma chuan ram pahnihte chuan inbiakna an nei thei dawn lo tih a sawi. 

Nimina BBC Urdu-in a kawmnaah, Pakistan minister chuan India nena an inkar boruak siamṭhat dan kawng zawnga inbiakna neih chu Pakistan sorkar chuan a dodal lo a, mahse he inbiakna hi Article 370 tihtawp a nih hnua India-in Kashmir khuahkhirhna a siam a hlih hunah chauh neih theih a ni ang, a ti. 

Pakistan chu midang nekchep zawngin a kal ngai lo a, remna leh muanna chu a dah pawimawh ber a ni, tiin Qureshi chuan a sawi. Indona chuan mi tam tak nunna a laksak a, khawvelin a nghawng ṭha lo an tuar bawk a, hei vang hian indo chu Pakistan duhthlan a ni ngai lo tih a sawi.