September-ah Amazon summit nei dawn

Brazil president Jair Bolsonaro chuan September 6 hian Colom­bia chhimlam khawpui, Leticia-ah South Ameri­ca-a Amazonian ramte'n 'Amazon summit' an nei dawn tih a sawi. 

Summit hi tunhnaia Amazon ramngaw nasa taka a kan vanga neih tur a ni. Summit-ah hian Venezuela ram chu a tel ve dawn lo a, environment humhim dan tura policy pakhat inṭawm leh renchem taka development kalpui dan tur an sawiho dawn a ni.

South America ram chhung bialah hian Brazil, Peru leh Colombia-te chu Amazon ramngaw chhah tak inzarpharhna lian ber a ni a, Venezuela, Ecuador, Bolivia, Guyana leh Suriname-ah pawh ramngaw hi a inzarpharh tel a ni.

France President Emmanuel Macron-a'n Amazon ramngaw kang hi international crisis a nih thu leh, khawvela rainforest lian ber hum tura hma la tura ramdangte a sawm chu Brazil hian a helh hle a, hemi avang hian G7-in ṭanpuina pek an tum pawh a hnar. Brazil president Jair Bolsonaro chuan France President chu an ram chungchanga inrawlhah a puh a, a thusawi avanga ngaihdam a dil chuan G7 ramte'n ṭanpuina pawisa an pek tur hi an pawm ang tih a sawi.