Hong Kong : Nawrh huaihawte leh police-te innawr buai

Hong Kong sorkar laka lungawi lohna lantir chhunzawm zel a ni a, nimin khan nawrh huaihawtte leh police-te innawr buaiin, police-ten mipuite hnawhdarh nan tear gas leh water cannon-te an hmang. 

Nawrh huaihawtte leh police-te innawr buaina hmun hi China sipai, People's Liberation Army local head­quar­ters bulah a ni a, mipui pungkhawmte chuan lungin police-te hi an tawng a, fire bomb-te an hmang tel bawk. 

Inrinni aṭangin nimin thleng khan nawrh hi chhunzawm a ni a, mahse nimin zing lamah erawh chuan pungkhawm hi an tlem deuh tawh a ni. PLA hian kar kal ta Ningani khan Hong Kong-ah a sipai dahte pawh a thlak kual a, hei hi a tihdan phung pangngai niin a sawi. Chinese official-te chuan Hong Kong-a nawrh huaihawt hi chhunzawm zel a nih chuan China sorkar a inrawlh a ngai ngei dawn tih an sawi. 

Hong Kong-a nawrh huaihawtte leh security force-te inkara tharum thawhna nasa tak a chhuah fo vangin police-te chuan kar kal ta khan nawrh hauihawt hi an khap a, mahse hetichung hian Inrinni khan mi tam tak pungkhawmin lungawi lohna an lantir chhunzawm tho a ni.