Israel leh Hezbollah Lebanon ramriah inkap

Lebanon ramriah Pathianni khan Israel leh Hezbollah helpawlte an inkap. 

Israel chuan Hezbollah-ten Lebanon ramri bula Israel army base leh motor-te chu anti-tank missile hmangin ṭum eng emaw zat an kap tih a sawi. Hetihlai hian Hezbollah chuan drone hmanga Israel-in a beih hmasakna an chhan letna tih an sawi thung. 

Pathiannia Hezbollah-te missile kahchhuah hian Israel ramri bula khua, Avivim-a hmun eng emaw zat a fuh a, a chhan letnan Israel chuan Lebanon ramchhung chu ṭum 100 chuang an  kap zui ve nghal bawk. 

Hezbollah chuan an missile kahchhuah hian tank tichhiain, a chhunga awmte pawh an thi tih a sawi. Mahse Israel chuan Hezbollah-ten an ram an beihnaah hian thi an awm lo tih a sawi thung. Israel army thupuangtu Jonathan Conricus chuan Hezbollah missile hian army base leh military ambulance a fuh tih a sawi. 

Pathiannia ramria inkahna a thlen hnu hian, Lebanon prime minister Saad Hariri chuan US Secretary of State Mike Pompeo leh France palaite biain, thil thleng hi a sawipui nghal a ni. Hariri chuan US leh France chu an ram chhim lam ramri-a inbeihna thleng chungchangah inrawlh a, indona a chhuah lohna tura hma laksak turin a ngen. 

Israel prime minister Ben­jamin Netanyahu chuan Lebanon ramria Hezbollah-te nena an inkah hnuah, Israel chu eng dinhmun pawh hmachhawn turin a inpeih tih a sawi. Netanyahu chuan, "Anti-tank missile hmangin beih kan ni a, a chhan letnan vawi 100 zet kan kap let bawk. Eng nge lo thleng zel tur tih kan sawiho mek a ni," tiin a sawi. Engpawh lo thleng se, inpeih turin a hriattir tawh tih a sawi a, hemi rual hian Hezbollah-te beihna avang hian Israle mi hliam leh thi an awm lo tih a sawi nghal bawk.