Yemen tan-in bomb-naah mi 60 an thi

Saudi Arabia leh UAE kaihhruai Arab ṭangrual sipaite chuan Yemen-a Houthi helpawl lakah beihpui an thlak leh a, Houthi-ten tan-in atana an hman an bomb a, tang 60 vel an thi. 

Houthi ministry of health thupuangtu, Yusuf al-Hadri chuan Pathianni khan Dharma khaw hmarlama tan-in atana an hman chu bomb a nih thu a sawi a, mi 60 thiin mi dang 50 velin hliam an tuar tih a sawi. He tan-inah hian tang 185 vel an awm mek a ni. 

Yemen-a International Committee of the Red Cross hotu, Franz Rauchenstein chuan bomb hian tan-in atana hman compound chhunga building pathum a fuh tih a sawi. Nimin khan tan-in hi a tlawh a, damdawi-ina hliam tuarte a kan kual nghal bawk.  

Houthi thupuangtu, Mohammad al-Bukhaiti chuan Dharma tan-ina tangte hi khawthlang ramten an thlawp, Yemen president Abd-Rabbhu Mansour Hadi kaihhruai sorkar nena tang inthleng tura inremna an siam tawh anga an chhuah hun nghak mekte an nih tih a sawi. 

Saudi kaihhruai Arab ṭangrual ramte hian Yemen sorkar thlawpin kum 2015 aṭang khan Iran thlawp, Houthi lakah hian beihpui an thlak tawh a ni. Beihpui an thlaknaah hian school, dawmdawi-in leh inneihna inkhawmna hmunte an kap tel a, civil mi tam takin an thih phah tawh vangin sawisel pawh an tawk nasa hle.