Japan-in a thliarkar vengtu tur special police force din dawn

Japan chuan China nena an inchuh buai reng, East China Sea-a a thliarkarte veng turin special police force a din dawn.

Special police force-te hian Okinawa thliarkar chu hmunpuiah an hmang dawn a, hei hi China nena an ram inchuh aṭanga km 420 a hla a ni. Police unit hi automatic weapon nen thuam an ni ang. An ram inchuh hi Japan lamin thununin, Senkaku tiin an vuah a, China chuan Diaoyu tih a vuah thung. 

Japan hian an thliarkar inchuhah hian sipai leh coastguard-te pawh a dah a, mahse tun ṭum hi police a dahna hmasa ber tur a ni ang. Hemi chungchang hi National Police Agency lam chuan an la sawichiang duh lo. Police agency hian nakkum April thla aṭangin Okinawa leh Fukuoka-ah officer 159 dah belh turin a lo ngen tawh a ni.