Myanmar-in Rakhine leh Chin state-a khuahkhirhna thlahdul

Myanmar sorkar chun an ram khawthlang lam state pahnih, Rakhine leh Chin state-a hun rei tak internet a tihtawp hnuah Pathianni aṭang khan khuahkhirhna a thlahdul ṭan.

Norway mobile operator, Telenor Group chuan June 21 aṭanga internet shutdown a nih hnuah, Pathianni zanlai aṭang khan transport and communication ministry chuan Rakhine leh Chin state-a khaw panga-ah internet a block-na hi a titawp ta tih a sawi. 

Kum 2017-a Myanmar sipaiten beihpui an thlak avanga  Rohingya muslim nuai sarih chuang zet Bangladesh rama an tlanchhiat avangin Rakhine state hi khawvelin a ngaihven hle. Ram hrang hrang leh United Nations ngei pawhin Myanmar sipaite chet dan chu chhui chian an phut a, hetihlai hian Myanmar sipai chuan an thiltihah tih dik lo a awm loh thu leh, border post beitu Rohingya hel lakah chauh beihpui an thlak nia sawiin an ṭang thung a ni. 

Hetihlai hian khawthlang lam state-ah hian Myanmar sipai leh Arakan Army helpawlte an inkap fo a, nikum November thla aṭang khan sipai leh helpawl inkahna avang hian Rakhine leh Chin state aṭang hian mi sing tel an tlanchhe tawh tih UN Office for the Coordination of Humani­ta­rian Affairs chuan a sawi.