Hurricane Dorian-in Bahamas a nuai

Atlantic-a hurricane na ber dawttu nia record, Dorian chuan nimin khan Bahamas a nuai.

Dorian hi thli chak tak leh insawn muang tak a ni a, khawthlang lam pan zelin  eastern US seaboard lam a nuai chhunzawm leh mai thei nia tarlang a ni. Hemi a nih avang hian Florida, Georgia, North leh South Carolina-te chuan state of Emergency nimin khan an puang nghal.

Bahamas bikah hian thi leh hliam report a la awm lo a, in a tihchhiat zat pawh report mumal tak a la awm lo bawk. US National Hurricane Center (NHC) chuan muangchangin Grand Bahama Island lam a pan tih an sawi. Thlipui tlehna hmunah hian power an nei lo a, internet a khawih mumal theih loh bawk avangin report mumal tak hriat a harsa hle.

Hetichung hian video leh tweet ṭhenkhat aṭang chuan mi 17,000 vel chenna Abaco Island chu a nuai nasa hle a, chhiatna pawh a thlen nasa hle. Car a len lai leh inchung a la lai video-te pawh hmuhtur a awm a ni.