Argentina-in a pawisa hlutna tlahniam tur veng

Argentina president Mauricio Macri kaihhruai sorkar chuan an ram economy-in tlakchhiat lam a pan zel avangin, an pawisa hlutna tlahniam zel tur ven nan an foreign-exchange-a Argentine exporter-te an khuahkhirh dawn. 

Kar liam ta Pathianni khan Official Bulletin-ah thupek ti chhuakin, an ram pawisa 'peso' hlutna tihsan a nih theih nan an ram bungraw thawn chhuaktu leh mipuite hnenah, foreign currency leina, thil hlu lei leh hralh emaw pawisa thawn chhuah chungchangah, Central Bank of Argentina hnena phalna la zel turin thuchuah an siam.

He thuchhuahah hian mimalin thlakatah US dollar 10,000 (€9,100) ai tam a lei thei loh thu tarlan a ni a, mahse hei aia tam lei duh an awm chuan Central bank-ah phalna lak a ngai dawn a ni. Company-in emaw mimalin emaw an pawisa bank aṭanga an lachhuak duh a nih chuan inkhuahkhirh chin a awm loh thu an tarlang bawk. He dan thar hi December 31 thleng hman tura tih a ni. 

Argentina hian an ram economy kum 2001 a nasa taka a thlakchhiat vangin International Monetary Fund (IMF) hnenah pawisa a puka, an leiba pawh hi an rul tlingtla ṭep tawh a ni. Kum 2018 aṭang khan Argentina hi economy lamah harsatna a tawk nasa zuala, kum 2009-a unemployment rate chu 8.65% a nih laiin kumin march khan 10.10 % a ni thung. IMF-in kum 2019-a inflation rate sang tura a beisei ram palite zingah Argentina hi a tel bawk. Kumin kum chanve chhunga inflation rate chu 22% a ni.

Bank lama harsatna lian tham an tawn thut hlauh thawn vangin, August thla khan mi tam takin bank aṭang an pawisa an la chhuak. Thla liam ta khan Argentina pawisa 'peso' thlakhniam ber ṭum a thleng. Kum 2015-a Macri thlan tlin a nih khan an ram economy chu theihtawpa a chawisan dawn thu leh corruption a do dawn thu a sawi a, mahse beisei a pha lo deuh niin a lang.