Bangladesh-in Rohingya camp-ah Mobile phone hman khap

Bangladesh sorkar chuan an ram chhim chhak lama Rohingya Muslim raltlante awmna camp-a mobile phone hman khapna thupek a tichhuak a, operator-te chu service titawp turin a hriattir.

Tunhnaiah Rohingya camp-ah hian tharum thawh­na a thleng fo a, hei vang hian thuneitute chuan security thil avangin mobile phone hman hi khap an ni tih an sawi.  Camp-a khawsa tam ber hi kum 2017-a Myanmar sipaite beihpui thlakna avanga  Myanmar aṭanga tlanchhiate an ni. 

Bangladesh Telecom­mu­nication Regulatory Commission (BTRC) thupuangtu Zakir Hos­sain Khan chuan tele­com­munication operator-te chu camp-a network an tihtawp dan report pe turin ni sarih hun pek an nih thu a sawi. 

Camp-a cheng tam tak hian mobile phone an hman avangin service tihtawp hian camp hrang hranga khawsa, raltlante inbiakpawhna kawngah harsatna lian tak a thlen ngei dawn a ni. Ratlante chuan an phone hman ve theih tihtawp sak an nih chuan Myanmar leh ram danga an chhungte pawh an be thei tawh dawn lo tih an sawi.

Hetihlai hian Bangladesh police thupuangtu, Ikbal Hossain chuan sorkar thu­pek hi a thlawp thu sawiin, ral­tlan zinga ṭhenkhat chuan thil ṭha lo tihna atan mobile phone chu an  hmang ṭangkai ṭhin tih a sawi.