Carrie Lam-i'n banna a thehlut lo tih a sawi
Hong Kong Chief Executive Carrie Lam chuan theih se chuan a bang mai ang tia a sawina audio a putchhuah hnuah, banna a thehluh loh thu a sawi.
Thawhṭanni khan private meeting an neihnaa "Duhthlang thei ni ila, ka tih hmasak chu ban hi a ni ang," tia a sawi record chu tihdarh a ni. Mahse nimin khan Lam-i chuan banna a thehluh loh thu a sawi a, mahse recording darh chungchang erawh a sawizui lo.
Audio record hi Reuters tihchhuah a ni a, kar liamtaa sumdawng hruaitute leh Carrie Lam ten private meeting an neihna ami nia sawi a ni. Nimina press conference a neihah, Lam hi audio leak chungchang hi zawh a ni a, private meeting-a a thusawi te record a, media hnena thehdarh a nih chu thil pawmzam mai chi a ni lo tih a sawi. Hemi rual hian banna a thehluh loh thu leh, hetiang lam sawi tumna pawh a neih loh thu a sawi nghal bawk. A duhthlanna tur a ni tih sawiin, Hong Kong-in dinhmun harsa tak a tawh mekah theihtawp chhuah a, Hong Kong mipuite tana thawh chu a tum tih a sawi.
Hong Kong-ah hian hun rei tak chu sorkar duh lohna lantirin kar 14 chhung chu a zawnin kartawpah nawrh huaihawt a ni tawh a ni. Nawrh huaihawtte hian China thlawptu, Carrie Lam hi bang turin an phut tel a ni. Thawhṭanni aṭang khan zirlaiten nawrh huaihawtte hi zawmin class an boycott a, nimin khan a ni hnihna atan zirlaiten hian nawrh hi an chhunzawm leh a ni.