Brazil President duh lotu pung

Brazil mipuite ngaihdan lakna tihchhuah thar berah, president Jair Bolsonaro duh lotu zat an pung zel. 

August 29-30 a Datafolha polling institute-in survey a buatsaihna result chu Thawhṭanni khan tihchhuah a ni. Mipui ngaihdan laknaah hian Bolsonaro kaihhruai sorkar ṭha tawk lo nia ngaitu chu 38% an tling a, a hmaa survey neihah khan sorkar duh lotu hi 33% an ni. 

Brazil sorkar a ṭha tawk nia ngaitu pawh an tlahniam a, survey neih hmasaa sorkar thlawptu 33% an nih laiin, survey hnuhnung berah hian 29% chauh an ni tawh a ni. 30% chuan president Bolsonaro chuan hna a thawk ṭha pangngai niin an ngai a, 2% erawhin ngaihdan an neih loh thu an sawi thung. 

Brazil president hi Amazon ramngaw kang vanga South America ramten Amazon Summit an neih turah a tel thei dawn lo tih a thupuangtu chuan a sawi. President Bolsonaro hi inzai a ngaih dawn avangin summit-ah hian a tel thei dawn lo a, a aiawh a tir dawn a ni. Bolsonaro hi kum 2018-a presidential election campaign lai khan a dulah vih a ni a, hei vang hian ṭum thum zet zai a lo ni tawh a ni. 

Bolsonaro hi inzai tur hian Colombia-a summit neih ni, Zirtawpni aṭangin liquid diet ṭan tir a ni dawn a, Pathianniah zai a ni ang. Doctor-te chuan zai zawh hnuah pawh ni 10 tal chu a chawlh hahdam a ngai dawn tih an sawi.