WHO team-in quarantine hun hmang zo ta
Covid-19 hri hmuh chhuah ṭanna, China-a Wuhan khawpuia hri lo hmuh chhuah leh a darh dan chhui chiang tura kal, World Health Organisation (WHO) team chuan China an thlen hnua khunghran an nih hun an hmang zo a, ground investigation an ti ṭan thei dawn ta.
Expert 13 awmna, WHO team hian Jnauary 14 khan Wuhan an thleng a, China sorkarin kaihhruaina a siam angin ni 14 chhung an inkhunghrang leh phawt a ni. Khun hran a nih chhung pawh hian an awmna hmun aṭang hian video call hmangin China scientist-te leh mi pawimawh dangte an kawm a ni.
Pawn an chhuah theih tak avangin expert team hian research institute, hospital leh hri hmuh ṭanna nia sawi seafood market-te tlawhin, mi hrang hrang an kawm kual ang. Zirchianna an neihna atan hian China official-ten evidence an pekte chu behchhanah an hman ang.
Covid-19 hri zirchiang tura expert team tirh tur chung changah WHO leh China sorkar chu ṭum eng emaw zat an inbiak hnuah China hian a remtih sak a, mahse team member-ten China an pan hian an zinga ṭhenkhat chu luh phalsak an ni lo. Mahse hei hi China chuan thil hriatsual palh vang nia sawiin, January 14 khan China hi an lut thei a ni.
Kum 2019 kumtawp lam khan Covid-19 hi Wuhan-ah hmuh ṭan a ni a, mahse China chuan hun rei tak chhung chu Wuhan hi Covid-19 hri lo chhuah ṭanna a ni lo tiin a ṭang. State media-te chuan a hmain he hri hi Spain, Italy leh US-ah emaw a lo awm ṭan tawh a, frozen food an lakluh aṭangin he hri hi an ramah a lut ve chauh niin an sawi. Mahse hei hi expert-te chuan an pawmpui lem lo thung.
Mitthi chhungten WHO team hmuh duh
Wuhan khawpuia Covid-19 vanga thi chhungte chuan World Health Organisation team hi hmuh an duh thu an sawi.
Mitthi chhungte hian Wuhan-a WHO team an thlen hnuah sorkar official lam ṭangin dal tumna an tawng thar leh niin UN health agency hnenah hian an sawi. Hri leng chungchang sawihona atana an hman, WeChat group eng emaw zat chu WHO team thlen hnuah China sorkar chuan a tihtawpsak niin an puh bawk.
Hripui vanga thi chhungte tam tak hian Wuhan city leh Hubei provincial goverment-te chu kum 2019 December thlaa Covid-19 hri hmuh a nih tirh khan thup tuma an buai hmasak avangin nasa takin hri hi a darh phah niin an sawi. Hri a darh ṭan tirh lamah pawh mipuite fimkhur turin hriattir mai loin, hma an la chak lo niin an puh a ni.