US journalist Daniel Pearl thattua puh chhuah dawn
Pakistan Supreme Court chuan kum 2002-a Wall Street Journal reporter, Daniel Pearl rukbo leh thahna thubuaia thiam loh chantir, Ahmed Omar Saeed Sheikh chhuahna tur thupek chu nimin khan a tichhuak.
Judge pathum awmna panel chuan Pearl thahna thubuaia thiam loh chantirte chu thiam chantir vekin, an chhuahna tur thupek a tichhuak niin provincial attorney general Salam Talbuddin chuan a sawi. Sheikh hi thi tura a chungthu relsak niin, a thurualpui nia puh Pakistan mi pathum dang chu dam chhung tang tura tih an ni bawk a, mahse heng mite pawh hi Supreme Court panel chuan thiam a chantir leh ta vek a ni.
Daniel Pearl hi The Wall Street Journal-a South Asia bureau chief a ni a, kum 2002 January thla khan Pakistan ram chhunga armed fighter-te chanchin a zirchian laiin Karachi-ah rukbo a ni. A rubotute hian a tlanchhuah tur sum an phut chungchang pawh an tichhuak a, mahse rukbo a nih aṭanga thla khat dawnah Karachi-a US consulate-ah video clip thawnin, Pearl lu an tansak lai an tilang.
Pearl chhungkaw lawyer-te chuan inrukbona leh tualthahna thlengah hian Sheikh chu a mawhphurtu berah an puh. Mahse defence lawyer lam chuan Sheik thiam loh chantir a nih danah hian finfiahna ṭha tawk a awm lo niin an sawi thung.