Russia eptu hruaitu Navalny thawhpuite man

Russia eptu pawl hruaitu, Alexei Navalny thawhpui mi eng emaw zat chu nimin zing khan Moscow-ah man an ni. 

Navalny hi tura hrai a nih avangin Germany-ah enkawl a ni a, thla nga zet a awm hnuah January 17 khan Russia-ah hian a kir a, mahse Moscow airport-ah an lo man nghal a ni. Hei vang hian amah thlawptu mi tam tak chuan Moscow bakah khawpui dang hrang hrangah lungawi lohna an lantir a, Navalny chu chhuah nghal turin an phut. 

Nimin zinga man zingah hian Navalny thawhpui hnai tak Lyubov Sobol bakah Alliance of Doctors ami Dr Anastasia Vaislyeav leh Pussy Riot ami Maria Alyokhina te pawh an tel a, Navalny unaupa Oleg pawh man tel a ni bawk. An pali hian Moscow-ah rally huaihawt chungchangah coronavirus regulation-te palzutah puh an ni. 

Hemi hma, Nilani zan khan Navalny chhungte leh a thawhpui hnaite in leh office eng emaw zat chu dap a lo ni tawh bawk. Navalny apartment, a nupui Yulia chen mekna pawh an dap tel a ni. Russia Investigative Committee chuan Navalny top strategist, Leonid Volkov chu dan kalha rally huaihawtnaah kum tling lote tel tura a fuih avangin a chungchang hi chhui chian mek a ni tih a sawi.