DR Congo election : Candidate Fayulu-an vote chhiar ṭhat phut

Democratic Republic of Congo (DR Congo) electoral commission-in nikum December thlaa an ram prsident thlanna result a tihchhuah chu inthlana tling zo lo, eptu candidate Martin Fayulu chuan a pawm lo tih sawiin, constitutional court ah vote chhiar ṭha tura ngenna a thehlut. 

President thlan result puan hun hi electoral commission hian hun eng emaw chen a tihkhawtlai hnuah, kar hmasa khan a puang a ni. Inthlanah hian eptu candidate tho Felix Tshisekedi chuan hnehna a chang a, Fayuly hi pahnihna niin rorellai party candidate chu pathumna a ni. 

Martin Fayulu chuan inthlan result hi a pawm lo tih sawiin, vote chhiar ṭhat ve phutin kar kalta Inrinni khan constitutional court-ah a ngenna a thehlut. Fayulu chuan Tshiskedi chu president kalchhuak tur Joseph Kabila nena inremna siamah a puh. Court-a appeal a thehluhah Fayulu chuan electoral commission-in president atana Felix Tshisekedi thlan tlin nia a puan chu hnawl turin a ngen. Inthlan result tihchhuahah hian thil dik tawk lo a awm a ni tih sawiin, thudik tak hailang turin a theih ang angin a bei zel dawn tih a sawi bawk. Fayulu chuan inthlan result puan chu ballot box-a vote tla nen a inmil lo niin a sawi a ni. 

Khawthlang ram sorkar eng emaw zat leh DR Congo-a Roman Catholic Church chuan inthlan result hi an rin loh ang tak a ni tih sawiin, enzui ngai nia an ngaih thu an sawi bawk. 

Candidate-te hian result hi an pawm lo a nih chuan result tihchhuah a nih aṭanga darkar 48 chhungin constitutional court-ah an appeal thei a, judge-te hian an ngenna hi ni sarih chhungin an ngaihtuah fel a ngai bawk. Court hian thlan tur pathum a nei dawn a, Tshisekedi chaka puanna chu nemnghet emaw, vote chhiar ṭhattir emaw, inthlan result tihchhuah tawh chu hnawla inthlan ṭhat buatsaih tir emaw a ngai dawn a ni. Mahse tunhma lamin constitutional court-a result tihchhuah tawh khin letnaah result hi hnawl a la ni ngai lo a ni. Hei vang hian Tshisekedi tlinga puanna pawh hi a pawmpui rin a ni a, a pawm chuan court thutlukna tihchhuah aṭanga ni 10 chhungin president atan lakluh a ni ang.