Ni 22 chhung US sorkar shutdown a ni tawh

Fund awm loh vanga US sorkar hnuaia department ṭhenkhat hnathawk thei loa khar, shutdown chu Inrinni kha a ni 22 a ni tawh a, US chanchina sorkar shutdown rei ber ṭum a tling tawh. Kum 1995-96 khan hetihlaia presiden Bill Clinton hnuaiah ni 21 chhung shutdown a lo ni tawh bawk. 

Ni 22 chhung sorkar shutdown ni tawh mah se, US President Donald Trump leh Congress chu Mexico ramri hungna bang siamna tura dollar tluklehdingawn 5.7 fund pek chungchangah an la inrem thei lo. Democratic hruaitute chuan President Trump-a sum phut hi an pawmsak thei lo a ni. Hun rei tak federal agency eng emaw zat hna thawk thei loa an awm tawh avangin hnathawktu nuai riat vel chuan hlawh pawh an la thei lo a ni. 

President chuan Congress hian shutdown tihtawp a nih theihna turin spending bill pass mah se, bill-ah hian ramri hungna tur a sum phut hi telh a nih loh chuan a thuneihna hmanga lo dan sakah a vau. Hetihlai hian Democratic lam chuan ramri hungna tur senso telhna bill chu lo dan zelah an vau ve bawk. Hei vang hian inremna hi an siam mai theih a rinawm lo hle. 

CBS News/YouGov in kar kalta Zirtawpni-a mipui ngaihdan a lakah sorkar shutdown chungchanga President Trump-a thiltih dan thlawptu chu 35% a ni a, 33% in Democrats lam an thlawp thung a, mi tam tak chuan ngaihdan an nei lo tih an sawi. Republican zingah 10-a pariat aia tamin Trump-a thiltih dan hi an thlawp a, Democrats lamah 10-a pasarihin Democrats chet dan an thlawp thung.