Shutdown titawp turin Trump ngen
Senior US Repubican chuan President Donald Trump chu kar thum chuang sorkar department ṭhenkhat hna thawk mumal thei loa khar tawh chu hawng lailawk turin a ngen.
President Trump nena inpawh ṭha tak nei, Senator Lindsey Graham chuan kar rei vak lo tal shutdown hi tihtawp a nih chuan Republican leh Democrats tan inremna zawnga inbiakna kawng a hawng thei dawn tih a sawi.
US sorkar hi ni 22 chuang shutdown a ni tawh a, US chanchina sorkar shutdown a nih rei ber ṭum a ni tawh hial. Hei vang hian sorkar hnathawk tam tak chuan hlawh an la thei lo a, office pawh eng emaw zat khar a ni bawk.
House of Representative thununtu, Democrats lamin Republican president Trump-an US-Mexico ramri hungna bang siamna tur sum a phut chu an la pawmpui thei lo. Democrats lam chuan sorkar shutdown tihtawp a ni theihna tura spending bill pass turah, ramri hungna bang senso telhna chu an pawm dawn lo tih an sawi a, hetihlai hian President Trump chuan Congress-in bill a pass-ah ramri hungna tur hi telh a nih loh chuan a thuneihna hmanga lo hnawlsakah a vau let ve thung.
Senate Judiciary Committee chairman, Graham chuan Pathianni khan Democrats lam nena inbiakna an neih leh theihna turin shutdown hi rei vak lo chhung tal titawp tura President a ngen thu a sawi. Democrats lam nena inbiakna an nei leh a, a hlawhchham ta a nih chuan, President chuan a hmaa a lo vau lawk angin national emergency chu a puang thei tawh ang, a ti.
Hun rei tak chhung sorkar shutdown a nih tawh avangin US khawpui hrang hrangah sorkar hnathawkte chuan kawng zawhin, shutdown titawp turin an ngen. Mi sang tel chuan sum lama harsatna a tawh phah avangin unemployment benefits dilna pawh an thehluh tawh niin an sawi.
Sorkar shutdown vanga Transportation Security Administration (TSA) agent indaih loh vangin kar kalta kartawp khan Miami International Airport pawh khar a ni tawh bawk. Pathianni khan Houston Bush airport-ah pawh staff indaih loh vangin terminal pakhata security screening an tih ṭhin pawh an tih theih loh phah bawk a ni.
Hetihlai hian Republican lawmaker ṭhenkhat chuan President Trump-an ramri hungna bang siam tur fund a hmuh theihna tura national emergency puana a vau chu an thlawp lo thung. Senator Ron Johnson, Homeland Security Committee chairman chuan President hian hei hi a titlang a nih chuan court-ah thlen a ni ngei dawn a, ramri hungna bang chu siam a ni thei dawn lo a ni, a ti. Republican hruaitu dang Steve Scalise pawhin President Trump chuan emergency puang tur hian thuneihna nei mah se, hei chu thleng lo se an duh tih a sawi.