Lion Air jet cockpit voice recorder hmu

Indonesian navy diver-ten Java Sea-a tla, Lion Air jet cockpit voice recorder chu hun rei tak an zawn hnuah an hmu ta niin nimin khan official-ten an sawi a,  hemi hmang hian thlawhtheihna chetsualna chhan hi hriat theih  beisei a ni. 

Nikum October 29 khan thla 2 chauha upa, Boeing 737 MAX 8 jet chu Jakarta aṭanga a thlawhchhua hnu lawkah Java Sea-ah hian a tla a, thlawhtheihnaa chuang mi 189-te chu an thi vek a ni. Deputy Maritime Minister Ridwan Djamaluddin chuan thlawhtheihnaa chuang zinga ṭhenkhat ruang chu tuipui mawngah hian hmuh an ni tih a sawi bawk. 

Indonesia navy westert fleet thupuangtu, Lt. Col. Agung Nugroho chuan diver-te hian high-tech equipment hmangin voice recorder hi tuipui mawnga lei hnuai meter 8-a thukah an hmuchhuak tih a sawi. Cockpit data recorder chu thlawhtheihna chetsual hnu ni reilotah hmuh a ni a, heta aṭang hian he thlawhtheihna hi a hmaa a flight pali aṭangin a khawl lamah alo felhlel deuh tawh tih hriatchhuah a ni tawh a ni. Voice recorder hi a chhiat loh chuan, thlawhtheihna chetsual dan chhuina kawngah a puih theih hle beisei a ni. 

Lion Air jet chesual hi kum 1997 hnua Indonesia-a airline chetsualna thleng rapthlak ber a ni. Kum 1997-a Medan bula Garuda flight tlaah khan mi 234 an thi a ni. Kum 2014 December thla khan AirAsia flight, Surabaya aṭanga Singapore pana thlawk chu tuipuiah tlain mi 162 an lo thi tawh bawk.