Thailand Court-in eptu party a ṭhiat

Thailand Constitutional Court chuan eptu party lian ber dawttu, Furture Forward Party ṭhiahna tur thupek a tichhuak. Party senior executive-te chu kum 10 chhung politics an khelh khap an ni bawk. 

Future Forward party hian an hruaitu Thanathorn Juang­roongruangkit hnen aṭangin election campaign neihna atana sum tam tham, campaign financing rules bawhchhiaah puh an ni. 

Thailand-ah hian political party-te hi mi pakhat hnen aṭangin baht  maktaduai 10 (dollar 320,000) aia tam an dawn khap a ni. Nikum March thla khan Thanathorn hian party election campaign neihna turin baht maktaduai 191 a pe nia sawi a ni a, mahse Future Forward party chuan hei hi donation ni loin, loan a nih thu an sawi thung. 

Future Forward Party chuan loan baht maktaduai 191 (dollar mtd 6) an lak chu dan ang thlapa tih a nih thu sawiin, campaign rules chu hriatthiam a har avangin loan an lak chungchangah dan an bawhchhiat leh bawhchhiat loh hriat a har thu an sawi. Political party dang pawhin loan hi an la ve  tho tih an sawi.

Nimina court thuchhuak hi mi tam takin an sawisel a, sipai thlawp sorkarin eptu party-te nuaibo a tumna hmanrua niin an sawi a ni. Nikuma inthlan­pui an neih hma lawkin Consti­tutional Court hian Thai Raksa Chart Party chu ṭhiat turin a lo ti tawh bawk.