Trump-a'n Republican lawmaker te ngenna hnawl

US Republican lawmaker ṭhenkhatin hun rei tak chhung sorkar shutdown ni tawh titawp tura an ngenna chu President Donald Trump chuan a hnawlsak. 

Republican senior Senator Lindsey Graham chuan Mexico ramri hungna bang siamna tur sum pek chungchangah President Trump leh Democrats lamte an inbiak chhunzawm leh theihna turin shutdown hi titawp turin a ngen a ni. US sorkar shutdown anih avanga department eng emaw zat chu hna thawk thei loin an awm a, sorkar hnathawk tam takin hlawh an la thei lo bawk. Fund pekchhuah chungchangah Democrats lam leh President Trump te hi an la inrem theih loh avangin US sorkar hi ni 24 zet shutdown a ni tawh a ni. 

President Trump chuan Senator Lindsey hian rawtna siam mah se a hnawlsak tih a sawi a, an rawtna siam chu a ngaihven lo tih a sawi. Ramri hungna bang siam tur chungchang chu tikhawtlai loa tihfel thuai a duh tih a sawi. 

Trump hian kum 2016 inthlan campaign auhlaa a lo hman tawh, US-Mexico ramri hungna bang siamna tur hian dollar tluklehdingawn 5.7 pe turin a phut a, mahse hei hi Democrats lam chuan an pawmpui thei lo a ni. 

Hetihlai hian Pentagon chuan Mexico ramri-a a mission chu kumin September thla thleng a pawtsei dawn tih a sawi. Nikum November thla khan Mexico ramri-ah hian sipai tam tham tak dahbelh an ni a, December thla tawpah lakchhuah tura tih ni mah se Department of Homeland Security ngenna avangin an awm hun hi pawhsei a ni leh ta a ni.