US leh North Korea te inbe leh dawn

United States leh North Korea chuan an ram hruaitu pahnihten inbiakna an nei leh dan tur ngaihtuahin tunkar chhung hian Washington-ah high-level talk neih an tum niin South Korea chanchinbu, Chosul Ilbo chuan a tarlang.  

US Secretary of State Mike Pompeo leh North Korea senior official Kim Yong Chol-te kaihhruai meeting hi Ningani emaw, Zirtawpniah emaw neih tum a ni a, he hunah hian US President Donald Trump leh North Korea hotu Kim Jong-ul te meeting vawi hnihna neih hun tur leh a hmun turte an rel fel nghal dawn nia sawi a ni.  

Kim Jong-un chuan kumthar thuchah a sawiah President Trump nena inhmuh leh a duh thu hi a lo sawilang tawh a, President Trump pawh hi lehkha a thawn a ni.  President Trump pawhin kar kalta khan Kim lehkha thawn chhan letna hi a thawn ve nghal nia sawi a ni bawk.