China-in ruihhlo tawlh rua puh Canada mi thi tura hremna pe

China court chuan Thawhṭanni zan khan an rama ruihhlo tawlhluta puh, Canada mi chu thi turin a chungthu a relsak. 

Kum 36 mi, Canada aṭanga kal Robert Lloyd Schelleberg hi kum 2016 March thla khan Dalian Court chuan an rama ruihhlo tawlhruk tuma puhin a chungthu a lo ngaihtuah tawh a, kum 2018 November thla khan thiam loh chantirin kum 15 tang turin a hrem a ni. Hei bakah hian Yan 150,000 chawi tura hrem a ni bawk. 

Schelleberg chuan Liaoning High People's Court-ah a appeal a, nikum December 29 aṭang khan Court chuan Court hniam zawkah a thubuai hi ngaihtuah ṭha turin a ti a ni. 

Dalian Intermediate People's Court chuan ngaihtuah ṭha lehin, kum 15 hremna a lo pek tawh chu a nep lutuk nia sawiin thi tura hremna a pe ta zawk a ni. A thil neihte pawh hrensak vek turin a ti nghal bawk. 

Schelleberg chuan Court hnenah hian an puhna te hi thu dik lo a nih thu sawiin, Laos, Myanmar, Malaysia, Singapore leh Thailand-te a tlawh hnuah China-ah hian a kal a, a ṭhian pakhatin ṭawng lettu atan mi pakhat, Xu Qing chu  hmang turin a ti a, Xu Qing chu International drug smuggler a lo ni tih a sawi. Thubuai siam chu amah ni loin Xu Qing lakah thubuai siam tur zawk a ni tih a sawi a, ruihhlo zawrh tur chungchang buaipuitu ber chu kum 2016 a Thailand a man, Canadia mi Khamla Wong ruahman vek niin a sawi bawk.

 

Mahse Chinese prosecutor-te chuan Schelleberg chu ruihhlo tawlhru pawlten Australia a Methamphetamine Kg 222 zet thawn an tum chungchangah a bultumtu niin an puh let thung. He thubuaiah hian China mi pahnih pawh thiam loh chantir niin pakhat chu damchhung tang tura hrem a ni a, pakhat dang chu thi tura hremna pek a ni.