Zimbabwe-ah petrol leh diesel man sang duh lohna lantir

Zimbabwe sorkarin petrol leh diesel man a tihsan avangin mipuite chuan an ram khawpui Harare leh khawpui dangah lungawi lohna an lantir a, nawrh huaihawtnaa buaina chhuakah mi eng emaw zat an thi a, mi tam tak man an ni bawk. 

President  Emmerson Mnangagwa kaihhruai sorkar chuan petrol man hi litre khat dollar 1.24 aṭagin dollar 3.31 ah a tisang a, diesel man pawh dollar 1.36 aṭangin dollar 3.11 ah a tisang bawk. President chuan tuialhthei man tihsan a nihna chhan chu an ramin tuialhthei an hman nasat lutuk tihziaawmna tur leh, dan loa tuialhtheia sumdawnna hluar zel tihtawpna tura tih a nih thu a sawi. A man tihsan a nih vang hian tuialhthei vanga harsatna an tawh eng emaw zat chu a ziaawm phah dawn niin a sawi. 

Zimbabwe Congress of Trade Unions (ZCTU) chuan sorkar thiltih dan hi na taka sawiselin, mi retheite dinhmun hriatthiam pui lo leh khawngaihna nei loah a puh. Tuialhthei man tihsan hi a tuartu ber chu mipui nawlpui an ni tih sawiin, hei vang hian lungawi lohna an lantir niin a tarlang. Sorkar chuan an harsatna chinfel dan a  ngaihtuah pui tak tak lo a, hei vang hian President Mnangagwa chu bang tura an phut thu an sawi bawk.