Ireland PM Varadkar a bang

Ireland prime minis­ter Leo Varadkar chuan Ningani khan PM aṭanga a banna lehkha an ram president Michael Higginsa hnenah a thehlut. 

President Higginsa chuan PM banna hi pawm sak nghal mah se, sorkar thar siam a nih hma chuan PM hna hi chelh chhunzawm rih turin Varadkar hi a lo ngen a ni. 

February 8 khan Ire­land lower house (Dáil Éireann) seat 160 awmna inthlan vawi 33-na chu neih a ni a, mahse he inthlanah hian party mala sorkar thei an awm lo. Hei vang hian March ni 5 thleng hi sorkar thar siam turin party-te hnena hun pek a ni.

Ireland-ah hian sorkarna siam tur chuan constituency 39 aṭanga seat 160 awmah seat 80 hmuh a ngai a ni. Inthlan neih zawh takah hian Sinn Fein leh Fianna Fáil party chuan seat la hnem berin seat 37 ve ve an la a ni. An dawtah hian Varad­kar-a party Fine Gael chuan seat 35 an la thung.  

Kum 2017 May thla khan Ireland PM ni ṭhin Enda Kenny chu a PM leh an party Fine Gael a hruaitu a nihna aṭangin a bang a, hemi kum vek June 2 khan Varadkar chu Ireland PM atan thlan tlin a ni ta a ni.