UK Parliament-in Theresa May-i Brexit deal hnawl

United Kingdom Parliament chuan Prime Minister Theresa May-in European Union aṭanga UK inlakhranna tura ruahmanna a siam, Brexit deal chu an hnawlsak. Hei vang hian March 29-a EU aṭanga UK inlakhranna turah pawh nghawng a neih rin a ni. 

Parliament member-te hian Brexit deal debate hi hun eng emaw chen an neih hnuah Thawhlehni khan vote an la a, member 432 in deal hi an thlawp lo a, member 202 in an thlawp thung. 

Vote lak hnuah May-i chuan House chuan a duhdan a lantir a, hei hi sorkar pawhin a ngaihthlak sak dawn a ni, a ti. May-i Brexit deal siam hi a hma pawhin Parliament member eng emaw zatin an lo sawisel tawh a, siamṭhat an phut a ni. 

Parliament-ah May-i deal hnawl a nih tak avangin Labour party chuan May-i rin tawk lohna motion chu an pulut nghal a, nimin khan sawiho a ni a, vote lak a ni bawk ang. May-i fiahna hi a paltlang thei a nih chuan epty party hruaitute chu hmuin, hma lak zel dan tur a sawipui dawn a ni. 

Britian hian kumin March 29 hian EU a chhuahsan dawn a, EU aṭanga a inlakhranna tur kalpui dan tur hi British leh EU hruaitute chuan ruahmanna an siam a ni. He inremna an siam hi UK Parliament chuan hnawl mah se ruahmanna ṭha ber a nih thu May-i chuan a la sawi reng a ni. May-i party, Conservative party member ngei pawhin EU leh British sorkarin inremna an siam hian an sawisel a, EU nen an la inhnaih dawn lutuk niin an ngai a, eptu party-te chuan an inremna siam hian economy lama thawhdunna a humhalh ṭha tawk lo niin an ngai bawk. 

European Council President Donald Tusk chuan PM Brexit deal hnawl a nih tak avang hian UK chu EU-ah awm chhunzawm mai turin a rawn. "Inremna siam chu an pawm theih siloh chuan, tuin nge a chinfel theihna kawng awmchhun chu siam thei ta ang?", a ti. EU official leh politician-te chuan UK Parliament-in deal a hnawl chu pawi an tih thu an sawi.