ICC-in Ivory Coast president hlui thiam chantir

The Hague-a International Criminal Court (ICC) chuan Ivory Coast president hlui Laurent Gbagbo chu a thubuaiah thiam a chantir. 

Laurent Gbagbo hi kum 2010-a an ram inthlan neih kaihhnawihah tharum thawhna nasa tak thlenga mi 3,000 an thih phahna leh, mi nuai nga zet himna zawnga an tlanchhiat phah chungchangah thubuai siamsak a ni. Kum 2011 khan Gbagbo hi a khingpui Alassane Ouattara thlawptu sipai, UN leh France sipaite chuan presidential palace bunker-ah an man a ni.

Gbagbo hi ram khat hruaitu hlui zinga ICC-a thubuai ngaihtuahsak hmasak ber a ni. 

Kum 2010 inthlanah Ouattara a hneh loh chu Gbagbo hian a pawm duh lo a, amah thlawptute chuan buaina nasa tak chawk chhuak zuiin, Ivory Coast ram hi thla nga chhung zet a buai zui hial. Hemi chhung hian chhim lama Abidjan leh khawthlang lama Duekoue-ahte mi tam tak tihhlum an ni. 

Prosecutor-te chuan Gbagbo hian a theih dan dan hmangin thuneihna a chelh chhunzawm zel tih sawiin, an rama buaina chhuak kaihhnawihah hian tualthah, pawngsual leh thubuai dangte an siamsak a ni. President hlui hi tharum thawhna leh pawikhawihna dang thlen tura amah thlawptute fuih zawnga thu sawiah an puh a ni. Mahse Gbagbo chuan an puhna a pha thung a, dik lo taka puh a nih chungchangah hian politics a inrawlh niin a sawi. 

Mahse ICC chuan Gbagbo thubuai a ngaihtuahnaah, prosecutor-te chuan an puhna finfiahna tur hi an nei lo nia sawiin, thiam a chantir a ni. Prosecutor-te chuan court thutlukna hi ziaka tihchhuah a nih hunah an appeal leh thei ang.