Malaysia-in Israel telna event thlen tum lo

Malaysia foreign minister chuan an ramin Israel telna event reng reng thlen an tum tawh lo tih a sawi. 

Muslim ram, Malaysia hi Palestinian thlawptu langsar tak a ni a, Isarel nen pawh palai an intir tawn lo a ni. 

Malaysia sorkar chuan kumin July thlaa 2020 Tokyo Paralympics neih tura qualifying event, Sarawak state-a neih turah Israel swimmier-te chu an tel theih loh tur thu a lo sawi tawh a ni. Hei hian sawisel hlawh  hle mah se, Malaysia sorkar chuan a thutlukna siam tawh hi thlak a tum lo tih a sawi. 

Foreign Minister Saifuddin Abdullah chuan kar kaltaa cabinet meeting chuan Palestnian-te an thlawpna lantirna atan Israel mite chu infiamna thil emaw, thil tihkhawm dang emawa tel turin Malaysia ram luh an remtih loh thu a tichiang tawh tih a sawi. Hei vang hian Israel mi emaw, a aiwhte emaw telna event reng reng thlen an tum tawh lo tih cabinet chuan a rel bawk a ni, a ti. 

Prime Minister Mahathir Mohamad chuan July 20-August 4 inkara Paralympics qualifying event an thlen tura Israel swimmer-te tel an phal loh chungchangah International Paralympic Committee chuan a duh chuan Malaysia ramin a thlen tur chu a sut leh thei ang, a ti. Commitee chuan Mahathir thu sawi duhdan chuan a tilawm lo hle tih a sawi a, hemi rual hian buaina chinfel dan kawng hi an ngaihtuah tur thu a sawi. 

Kum 2015 khan Malaysia hian Langkawi resort island-a intihsiaknaa tel tum, Israel windsurfer pahnihte chu an rama luh a lo phal lo tawh bawk. Hei bakah hian kum 2017 khan FIFA conference chu Israel palai a tel ve dawn avangin thlen a duh lo tawh bawk a ni.