Israel PM-in Iran inbiakna neihpui lo turin ngen

Israel prime minister Benjamin Netanyahu chuan Iran inbiakna neihpui lo turin ramdang hruaitute a ngen. 

Benjamin Netanyahu hian nimin khan Britain prime minister Boris Johnson hmu turin London a pan a, Iran chungchang a sawipui dawn a ni. London pana a chhuah hmaa Israel PM Office-in thuchhuah a siamah, "Hruai­tu pahnihte hian Middle East bial chhung boruakte sawidunin, Iran chetdan an duh loh thute pawh an sawidun dawn a ni," a ti. 

Netanyahu hian London-ah hian United States Secretary of Defence Mark Esper pawh a hmu nghal dawn a ni. Israel PM chuan, "Tun hi Iran inbiakna neihpui hun a ni lo a, Iran nawr hun a ni zawk," tiin a sawi. 

US President Donald Trump chuan New York-a UN General Assembly neih hunah Iran President Hassan Rouhani chu a hmu maithei niin a sawi a, he thu a sawi hnuah hian Israel PM hi a rawn ṭawngchhuak ve nghal a ni. Hetihlai hian Iran chuan 2015 nuclear deal aṭanga US a inhnuhdawh hnuah US-in an ram hrekna hrang hrang a siamte a tihtawp phawt loh chuan, Trump chu inbiakna neihpui an tum lo tih a sawi tawh a ni.