South Africa summit aṭangin Nigeria inhnukdawk

Nigeria chu South Africa khawpuia buaina chhuakah Nigeria mite beih an nih avangin African economic summit aṭangin a inhnukdawk. 

Nigeria vice president Yemi Sinbajo chu Cape Town-a World Economic Forum (WEF) neih mekah nimin khan thu sawi tur a ni. Mahse he summit aṭanga an inhnuhdawh avang hian intra-African trade tihlenna tura hmalakna tur kawngah nghawng a neih phah ngei rin a ni. 

Tunhnaiah South Africa-a Johannesburg leh Pretoria-a tual­chhung buaina chhuak vangin mi panga an thi tawh a ni. Nigeria mite beih an nih avang hian Nigeria khawpui hrang hrangah South Africa mite sumdawnna hmunte beih let an ni. Hei vang hian Nigeria-a South African telecom operator MTN chuan Nilaini aṭang khan khawpui pathuma an dawr leh service centre-te chu an khar.  Nigeria-ah hian MTN hmangtu hi kum 2018 khan mak­taduai 58 zet an awm a ni. 

Nigeria leh South Africa hi Africa economy lian ram pahnih an ni a, Nigeria-ah hian South Africa aṭanga pemlut tam tham tak an awm. Hetihlai hain South Africa pawhin Nigeria ramah sumdawnna tam tham tak a kalpui mek a, heng zingah hian telecommunication, banking, energy, hotel leh media lamte a tel.