UK PM-in inthlan sawn hma a rawtna House-in hnawlsak

Britain prime minister Boris Johnson-a'n an ram inthlanpui, October 15-a sawn hma tura rawtna a siam chu lawmaker-te chuan Nilaini khan an hnawlsak.

House of Commons chuan Prime Minister rawtna siamah hian vote lain a duh lamah vote 56 chiah a tla a, duh lo lamah vote 298 a tla thung. House of Commons hian European Union aṭanga inremna siam loa Britain an chhuah lohna tura bill siam, Brexit delay bill chu a pawm bawk.

Johnson hian a rawtna kal­tlangpui tur hian House member hmun thuma ṭhena hmun hnih vote a hmuh a ngai a ni. Inthlanpui hi kum 2022-a neih chauh tur  a ni a, mahse PM hian kumin October 15-a sawn hma hi a rawt a, pawmpui a ni ta lo thung.

Vote chhiar a nih zawh hnu hian Johnson chuan Labour Party leader Jeremy Corbyn chu an rama eptu hruaitu 'inthlanna nei tura sawmna' hnawl hmasa ber a nih thu a sawi. Hei hi a chak zawh a rin loh vang tih a sawi. Jeremy Corbyn chuan PM hi chhanglet nghalin, no-deal Brexit hman a nih theihna turin langsar lo takin 'game' a khel a ni, a ti ve thung. A party chuan bill pawm a nih hunah chuan inthlanna neih chu an duh dawn tih a sawi a, inthlan hma erawh chuan an thlawp lo tih a sawi bawk.