Zimbabwe president hlui Robert Mugabe a thi
Zimbabwe President hlui Robert Mugabe chu hun rei tak a dam loh hnuin nimin khan kum 95 mi niin Singapore-ah a thi.
Robert Mugabe hi kumin April thla aṭang khan Singapore damdawi-inah enkawl a ni a, damdawi-inah hian a thi zui ta a ni. Mugabe thih thu hi Zimbabwe president Emmerson Mnangagwa chuan a twitter-ah a tarlang a ni.
Mugabe hi kum 1924 February 21 khan Zimbabwe thingtlang khua Kutama-ah a piang. Kum 2017 khan Zimbabwe chuan an ram president hlui, Robert Mugabe-a piancham, February 21 chu national holiday atan a puang a, National Youth Day atan hman a ni bawk.
Zimbabwe-in UK lak aṭanga zalenna an hmuh hnuah Mugabe hi an ram Prime Minister hmasa ber a ni. A rorel hun chhung hian 'black' ho hriselna leh zirna lamah ṭan a la hle bawk. Kum 1987 aṭang khan President hna a chelh . Kum 37 chhung zet Zimbabwe ramah ro a rel hnuin, an ram rorelnaa sipaite an inrawlh hnu leh ram mipuiten an nawr nasat avangin kum 2017 November 17 khan president a nihna aṭangin a bang.
A rorel chhung hian kawng hrang hrangin sawisel pawh a tawk nasa a, inthlan tichingpenahte puhin, an ram sum dinhmun tlakchhiat chhanah pawh mawhphurtuah puh a ni tawh. Ram hruaitu a nihna aṭanga chawl tawh tura nawrna pawh a tawng bawk.
Robert Mugabe
1924 - A pian kum
1964 - Rhodesian sorkarin jail-ah an khung
1980 - Inthlannaah hnehna a chang a, PM a ni zui
1996 - Grace Marufu nen an innei
2000 - Danpui siamṭhat a tumna a hlawhchham, amah thlawptuten eptu lamte an bei
2008 - Election first round-ah Tsvangirai a hneh lo, mahse 2nd round-ah Tsvangirai a inhnuhdawh avangin a chak zui leh
2009 - An ram economy a tla hniam a, a khingpui Tsvangirai chu PM atan thlan a ni
2017 - Hun rei tak a thawhpui tawh, vice president Emmerson Mnangagwa a ban
2017 - Sipai chakna hmangin tih luihnain President aṭanga paih thlak a ni.