Boris Johnson-a'n Brexit tihkhawtlai tum lo

Britain prime minister Boris Johnson chuan European Union aṭanga Britain inlakchhuah tur, October thlaa tihfel tura ruahman tawh chu tihkhawtlai a tum lo tih a sawi. "Brexit tihkhawtlai ai chuan ka thi zawk mai ang," a ti. 

PM Johnson chuan Withdrawal Agreement siam thei lo mah se, an hun ruat October 31-ah chuan EU aṭanga eng kawng zawng pawha inlakchhuah ngei a tum thu a lo sawi tawh a ni. Mahse House of Commons chuan inremna tel loa EU aṭanga inlak chhuah danna tur bill chu tunkar tir lam khan a lo pass tawh a ni. Hei bakah hian Johnson-a'n inthlan sawn hma a rawtna pawh an hnawlsak bawk. 

Ningani-a Wakefield-a police academy-a thu a sawiah, Conservative leader Johnson chuan, EU hnena Brexit tikhawtlai leh tura dil ai chuan a thi mai zawk ang tih sawiin, October 31-ah chuan EU aṭang chuan an chhuak ngei tur a ni tih a sawi. 

PM hian a Brexit plan sawiseltu, Tory MP 21 zet a lo hnawtchhuak tawh a ni. Ningani khan a unaupa, Jo Johnson pawh Boris Johnson Brexit plan duh loh vangin junior universities minister a nihna aṭangin a bang ve leh bawk. Jo Johnson chuan MP inthlan neih leh hunah pawh a chuh tawh dawn lo tih a sawi nghal a ni.